Blog - Riyadoh Miftahul Huda

KH. Jaja Abdul Jabbar

Fadlilah Sareng Hikmah Dzikrulloh

Teu aya deui parentah dina Qur’an anu pangseueur-seueurna kajaba parentah kudu eling ka Alloh (Dzikrulloh). Ieu nandakeun yen eling (dzikir) mangrupikeun hal anu paling penting anu kudu diusahakeun, anu kudu dipertahankeun salawasna.

Malahan sakabeh ibadah anu mangrupakeun pamolah saperti sholat, atanapi nu mangrupakeun baca’an eta sadayana pikeun eling ka Alloh. Jalma anu bisa miboga sikap eling jeung dzikir maka bakal jadi jalma nu bagja, jalma anu henteu bisa ngalakukeun eling karena hatena katungkul ku alam dunia, maka eta jalma bakal jadi jalma rugi.

Jalma nu hatena tetep eling bakal dibere kahirupan anu tentrem, tenang. Jalma nu eling ka Alloh hatena bakal dibersihkeun tina kokotor-kokotor hate nu disebut rodzailul qulub. Jalma nu eling ka Alloh bakal meunang pangasih ti Gusti Alloh, jalma nu eling ka Alloh nu sibuk hatena eling ka Alloh bakal dipaparin perkara nu leuwih unggul tibatan nu dibikeun ka jalma nu menta (ngadu’a) ka Alloh.

Penjelasan

Upami merhatoskeun ayat Al-Qur’an ti awal dugi ka akhir, teu aya parentah nu ngalindih (ngadominasi) kandungan ayat Al-Qur’an kecuali nu parentah pikeun dzikir. Ti kawit surat Al-Baqoroh seueur ayat nu lafadzna:

اُذْكُرُوْا...

Upami ku urang diemutan, bakal tiasa narik kasimpulan yen dzikir ka Alloh nyaeta hiji perkara nu paling dianggap penting dina kahirupan alam dunia ieu, numawi seueur diparentahkeunana ku Alloh dina Al-Qur’an. Sedengkeun parentah saperti Aqiimussholah, Itaauzzakah teu pati seueur dibanding sareng perintah Udzkuru. Ieu nandankeun yen dzikir teh mangrupakeun hiji hal anu penting dipimilik khususna ku sakabeh mu’min.

Malihan sakabeh ibadah, naha eta mah solat, puasa, ibadah haji jeung sajabana eta teh sadayana diperintahkeun ku Alloh supaya urang eling ka Alloh.
Didawuhkeun dina Al-Qur’an surat Thoha ayat 14 :

...... وَأَقِمِ ٱلصَّلَوٰةَ لِذِكۡرِيٓ ١٤

“..... Jeung kudu ngadegkeun anjeun kana sholat pikeun eling ka Kami”.

Nyakitu dina ibadah haji, sami tujuanna pikeun eling ka Alloh. Dawuh Alloh SWT dina surat Al-Baqoroh ayat 198 :

.... فَإِذَآ أَفَضۡتُم مِّنۡ عَرَفَٰتٖ فَٱذۡكُرُواْ ٱللَّهَ عِندَ ٱلۡمَشۡعَرِ ٱلۡحَرَامِۖ .... ١٩٨

Malah Al-Qur’an oge disebatna Adz-Dzikro,

.....ۗ وَأَنزَلۡنَآ إِلَيۡكَ ٱلذِّكۡرَ ...... ٤٤

Numawi, Al-Qur’an diturunkeun, sholat diparentahkeun, ibadah haji kudu dilaksanakeun, sarta rupa-rupa ibadah sanesna eta sadayana dina raraga sangkan eling ka Alloh SWT.

Usahakeun urang sadayana eling ka Gusti Alloh ulah nepi ka lali/poho, lantaran ari eling ka Alloh teh mangrupakeun motivasi pikeun ngalakukeun amal, bakal jadi pendorong pikeun ibadah ka Alloh, bakal jadi sabab kana alusna prilaku.

Sabalikna, lamun poho (goflah) teu sadar diri ciptaan Alloh anu suatu saat bakal balik ka Anjeunna, maka hirup bakal sakadaek, sakasampeurna, bakal beurat pikeun amal soleh, lancar pikeun nuturkeun hawa nafsu, kadituna umurna teu berfaidah, teu barokah.

Poho ka Alloh berarti poho kana parentah-Na, bakal seueur parentah anu teu dilaksanakeun. Poho ka Alloh berarti poho kana batasan-batasan aturan Alloh, bakal seueur larangan Alloh anu dilakonan, maka umurna eta jalma bakal pinuh ku karugian. Alloh ngadawuhkeun dina surat Al-Munafiqun ayat 9 :

يَٰٓأَيُّهَا ٱلَّذِينَ ءَامَنُواْ لَا تُلۡهِكُمۡ أَمۡوَٰلُكُمۡ وَلَآ أَوۡلَٰدُكُمۡ عَنْ ذِكۡرِ ٱللَّهِۚ وَمَن يَفۡعَلۡ ذَٰلِكَ فَأُوْلَٰٓئِكَ هُمُ ٱلۡخَٰسِرُونَ ٩

“Hai jalma nu iman, ulah nyibukkeun ka maraneh kabeh harta kakayaan jeung anak-anak maraneh kabeh (sahingga) jadi jauh ti Alloh. Saha jalma anu katungkul ku harta jeung kahirupan dunia nepi ka poho ka Alloh SWT, maka eta jalma kaasup jadi jalma nu rugi”.

Dina ayat salajengna didawuhkeun :

وَأَنفِقُواْ مِن مَّا رَزَقۡنَٰكُم مِّن قَبۡلِ أَن يَأۡتِيَ أَحَدَكُمُ ٱلۡمَوۡتُ .... ١٠

“Infaqkeun sebagian harta kekayaan maraneh kabeh samemeh datang maot ka salasahiji aranjeun kabeh”.

Lantaran lamun kaburu datang maot samemeh bisa ibadah eling ka Alloh bakal timbul kahanjakalan nu kacida poharana. Nalika jalma geus dicabut nyawana, maka manehna bakal hanjakal lantaran salila hirup di alam dunia teu leres-leres eling ka Pangeran.

Didawuhkeun ku Alloh SWT. masih dina ayat 10 surat Al-Munafiqun :

...فَيَقُولَ رَبِّ لَوۡلَآ أَخَّرۡتَنِيٓ إِلَىٰٓ أَجَلٖ قَرِيبٖ فَأَصَّدَّقَ وَأَكُن مِّنَ ٱلصَّٰلِحِينَ ١٠

“Nun Gusti pami tea mah ngakhirkeun sakedap (ulah waka dimaotan), maka abdi bade seueur sodaqoh, sareng bade janten jalmi anu soleh”.

Didinya, waktu karasa kacida rugina gara-gara hirup di alam dunia loba poho ka Alloh. Naha diijabah pamentana nu hayang diengkekeun ajalna? Moal diijabah..

وَلَن يُؤَخِّرَ ٱللَّهُ نَفۡسًا إِذَا جَآءَ أَجَلُهَاۚ وَٱللَّهُ خَبِيرُۢ بِمَا تَعۡمَلُونَ ١١

Numawi hayu urang persiapkeun ti ayeuna keneh, bawa hate sina eling ka Alloh, tuntun ku prilaku dhohir. Matak aya dzikir lisan eta teh supaya dhohir katingali dzikir, supaya berpengaruh kana batin.Dina sadinten sawengi sing aya waktu kangge maca Qur’an,istighfar, takbir, tahmid, tahlil jeung sajabana, niatan pikeun syukuran ka Pangeran.

Dawuh Rosululloh Saw :

عَنْ أَبِي هُرَيْرَةَ ، رَضِيَ اللهُ عَنْهُ قَالَ : قَالَ رَسُوْلُ اللهِ صَلَّى اللهُ عَلَيْهِ وَسَلَّمَ : كُلُّ سُلَامَى مِنَ النَّاسِ عَلَيْهِ صَدَقَةٌ كُلَّ يَوْمٍ تَطْلَعُ فِيْهِ الشَّمْسُ.... الخ (رواه البخاري ومسلم).

“Katampi ti Abi Hurairoh Ra. Parantos ngadawuh Kangjeng Rosululloh Saw. : (Saeyana) dina satiap bubukuan awak (sendi-sendi) eta boga kawajiban shodaqoh dina tiap poena (salagi) bijil keneh panon poe ti beulah wetan”. (HR. Bukhori, Muslim)

Lamun diri urang tara dzikir, kurang maca tasbeh jeung sajabana, maka sarua jeung diri tara sodaqoh tina nikmat anggota badan. Naon atuh nu dimaksud ku shodaqoh tina anggota badan ? salah sawiosna nyaeta ku ngabiasakeun diri maca tasbih, takbir, tahmid, tahlil jeung sajabaning rupa dzikir.

Didawuhkeun deui ku Kangjeng Rosul Saw :

عَنْ أَبِي ذَرٍّ رضي الله عنه أيضا أَنَّ أُنَاسًا مِنْ أَصْحَابِ رَسُوْلِ اللهِ صلى الله عليه وسلم قَالُوا لِلنَّبِيِّ صلى الله عليه وسلم : ...... قال : ....... إِنَّ بِكُلِّ تَسْبِيْحَةٍ صَدَقَةٌ ، وَكُلِّ تَكْبِيْرَةٍ صَدَقَةٌ ، وَكُلِّ تَحْمِيْدَةٍ صَدَقَةٌ ، وَكُلِّ تَهْلِيْلَةٍ صَدَقَةٌ .....الخ (رواه مسلم)

“Katampi ti Abi Dzar Ra. saenyana pirang-pirang jalmi ti para Sahabat Rosul naros ka Kangjeng Rosululloh Saw. teras ku kangjeng Rosul diwaler : Saenyana dina tiap-tiap maca tasbih eta teh shodaqoh, jeung tina tiap-tiap maca takbir eta teh shodaqoh, tiap-tiap maca tahmid eta teh shodaqoh, tiap-tiap maca tahlil eta shodaqoh.....” (HR. Muslim).

Manfaat sejenna tina dzikir eta pikeun ngajaga (nyangcang) hate supaya eling ka Alloh, supaya teu beurat teuing hisaban engke di akherat. Lantaran lamun hirup kalawan teu eling ka Alloh bakal sakadaek hirup, engkena bakal nyanghareupan hisaban anu beurat, Naudzubillahi min dzalik.

Jalma nu eling ka Alloh bakal dibere (diburuhan) katenangan hirup, bakal tentrem jauh tina perasaan bingung, loba kasieun, was-was. Sanajan loba pikasusaheun, teu matak jadi pengaruh nanaon kana hate, bakal aya dina pangaping jeung lindungan Alloh SWT.

اَلَا بِذِكْرِ اللهِ تَطْمَئِنُّ الْقُلُوْبُ

“Sing inget yen dizikir (eling) ka Alloh eta nentremkeun hate”.

Jalma nu biasa dzikir ka Alloh hatena bakal bersih tina rodzailul qulub (kokotor/panyakit hate).

Dawuh Rosululloh :

عَنْ عَبْدِ اللهِ بْنِ عَمْرٍ رَضِيَ اللهُ عَنْهُ عَنِ النَّبِيِّ صَلَّى اللهُ عَلَيْهِ وَسَلَّمَ أَنَّهُ كَانَ يَقُوْلُ: لِكُلِّ شَيْءٍ صَقَالَةٌ ، وَإِنَّ صَقَالَةَ الْقُلُوْبِ ذِكْرُ اللهِ عَزَّ وَجَلَّ .... (رواه البيهقي)

“Katampi ti Abdulloh ibnu Umar Ra. katampi ti Kangjeng Rosululloh Saw. Anjeunna ngadawuh : Eta tetep pikeun sagala perkara ari aya pengkilapna. Saenyana ari pengkilap hate nyaeta dzikir (eling) ka Alloh ‘Azza Wa Jalla”. (HR. Baihaqi)

Teu beda saperti barang-barang sakurilingeun urang nu sok kakeunaan kokotor nu sok dibersihan, digosokan supaya bersih mengkilap. Lantai, sapatu, parabot, perhiasan, batu ali jeung sajabana supaya herang, bersih, mengkilap eta teh aya pengkilapna.

Nyakitu deui sangkan hate mengkilap, bersih tina kokotor panyakit hate, bersih tina keraguan, patekadan nu sasar jeung sajabana aya pengkilapna, nyaeta dzikir (eling) ka Alloh SWT.

Kayakinannana bakal bersih, hatena bakal terbuka bisa maca kana perkara gaib (maksadna : bisa maca mana nu pisalameteun pikeun kahirupan akherat), kadituna bisa ngudag/ngupayakeun kana naon nu jadi pibagjaeun akherat jeung ngahindar tina nu matak picilakaeun.

Jalma nu hatena eling ka Alloh, bakal meunang predikat Auliyaulloh, lisanna teu lesot tina dzikir nyakitu deui hatena. Jalmi nu kitu kenging "Wilayatulloh" (pangasih ti Alloh).

Saur para Sholihin :

مَنْ أُوْتِيَ الذِّكْرَ فَقَدْ أُوْتِيَ مَنْشُوْرُ الْوِلَايَةِ

“Saha jalma nu dibere kemampuan dizkir (eling) ka Alloh, maka nyata parantos dipaparinan predikat kawalian anu diawurkeun (dina pada yen sadaya jalmi bisa ngupayakeunna)”.

Jadi, sadayana jalmi (mu’min) gaduh peluang pikeun ngaraih predikiat wali, tinggal daek ngupayakeunna ku jalan baseuhkeun biwih ku dzikir, tungtun hate sangkan terus eling ka Alloh, insya Alloh bakal meunang pangasih ti Alloh SWT. jalma nu hatena eling fokus dzikir ka Alloh, nyakitu deui lisanna, nepi ka teu inget barang penta ka Alloh, maka bakal dibere buruhan (ganjaran, ijabah) anu leuwih tibatan jalma nu menta/ngadu’a.

Dawuh Alloh dina hadits Qudsi :

مَنْ شَغَلَهُ ذِكْرِي عَنْ مَسْأَلَتِي أَعْطَيْتُهُ أَفْضَلَ مَا أُعْطِي السَّائِلِيْنَ

“Saha jalma nu katungkul/fokus/sibuk eling ka Kami nepi ka poho teu barag penta/ngado’a ka Kami, maka kami bakal mere ka manehna ku pamere anu leuwih utama tibatan nu dibikeun ku Kami ka jalma anu menta”.

Lamun jalma nu menta/ngadu’a Allohummarzuqnaa “Yaa Alloh paparinkeun rizqi.." nu hiji deui (jalma nu biasa dzikir/eling) teu ngadu’a Allohummarzuqnaa.. maka ningali janji Alloh nu eta bakal leuwih gede dibikeun ka jalma nu eling Dzikir.

Jadi dzkir teh mangrupakeun perkara anu leres-leres penting, anu kudu dipimilik ku sararea. Hayu urang sasarengan berusaha jadi jalma anu teu liren eling ka Alloh SWT. supaya kahirupan dunia ieu leres-leres berkah, sanaos umur di dunia ieu singkat.

Mudah-mudahan urang sadaya salamina dipaparinan hidayah sareng taufiq ku Alloh SWT. sahingga urang kagolong jalmi nu eling (dzikir) ka Alloh SWT. Amin Ya Robbal Alamin.