Blog - Riyadoh Miftahul Huda

KH. Abdul Aziz Affandy

Nalika Kumaha Datangna Pitulung Alloh?

Urang salaku manusa butuh kana pitulung Alloh, oge Alloh eta Dzat anu sok nulungan. Kajaba pikeun jalma anu boga kalakuan nuturkeun jalma-jalma anu dholim, pikeun jalma nu kitu moal aya pitulung Alloh.

Salasahiji tanda jalma dholim nyaeta jalma nu teu narima kana paparin Alloh pikeun dirina, sahingga ninggalkeun laku lampahna tina parentah Alloh.

Penjelasan

Dawuh Alloh SWT. dina surat Hud ayat 113 :

وَلَا تَرۡكَنُوٓاْ إِلَى ٱلَّذِينَ ظَلَمُواْ فَتَمَسَّكُمُ ٱلنَّارُ وَمَا لَكُم مِّن دُونِ ٱللَّهِ مِنۡ أَوۡلِيَآءَ ثُمَّ لَا تُنصَرُونَ ١١٣

Jeung kade maraneh ulah condong ka jalma-jalma anu darolim anu ngalantarankeun maraneh direrab ku seuneu naraka, jeung moal aya anu nulungan ka maraneh salian ti Alloh, tuluy maraneh moal ditulungan.

Dina ayat anu sanes (surat Al-Maidah ayat 51) :

.... إِنَّ ٱللَّهَ لَا يَهۡدِي ٱلۡقَوۡمَ ٱلظَّٰلِمِينَ ٥١

Saestuna Alloh henteu maparin pituduh ka jalma-jalma anu darolim.

Dina surat Ali Imrom ayat 192 :

....وَمَا لِلظَّٰلِمِينَ مِنۡ أَنصَارٖ ١٩٢

Sareng moal aya anu nulungan ka jalma-jalma anu darolim.

Alloh teh eta Dzat anu sok nulungan, manusa berhak meunang pitulung Alloh. Sacara fisik nepi ka detik ayeuna urang bisa hirup, bisa jadi jalma nu Iman jeung Islam, bisa jadi jalma nu daek narima nasehat, eta sadaya estuning pitulung Alloh SWT.

....قُلۡ كُلّٞ مِّنۡ عِندِ ٱللَّهِۖ .... ٧٨

Bejakeun ku Anjeun Muhammad : “Kabeh oge datangna ti Alloh!”.

Lamun ditingali tina sisi kalayakan diri, boh dina segi loba sauetikna amal ibadah atawa tina kualitasna ibadah, jigana urang teu kaasup jalma nu layak. Tapi ku ayana pitulung Alloh, urang bisa tetep jadi jalma iman jeung islam. Lamun lain ku pitulung Alloh, urang pasti moal mampu.

Tapi teu sakabeh jalma bisa kitu,

Contona, budak nu umur belasan taun (remaja) nalika pasosore maju ka peuting arulin di jalan, pergaulan nu kadang kaliwat batas. Tapi Alhamdulillah urang mah bisa ngariung di Masjid, cicing di tempat neangan elmu. Ieu ngajadi bukti yen aya pitulung Alloh, oge urang memang butuh kana pitulung Alloh.

Sering terjadi nu geus karandapan malah mungkin nu keur karandapan, urang sok disanghareupkeun kana masalah anu teu ka ukur ku pikir, teu kahontal ku perasaan, nu teu mampu nyanghareupannana, tapi Alloh sok maparin jalan pangsaena pikeun ngajalani masalah nu disanghareupan.

Dugi ka iraha ge urang pasti mikabutuh kana pitulung Alloh. Naon sababna? Sabab proses ti ayeuna ka hareup (nepi ka tung-tung hirup) sadayana terjadi wungkul ku pitulung/kersa-Na Alloh.

Ulah disangka urang teh bakal angger kieu wae. Perhatikeun, lamun urang boga foto 20 taun katukang coba tingali akurkeun secara kasat mata, katingali yen secara fisik diri pasti aya perubahan, nyakitu deui secara psikis (kajiwaan) pasti aya perubahan. Seueur conto, jalma nu mimitina buraong bangkawarah tapi ku sabab aya pitulung Alloh (dibere hidayah) akhirna jadi husnul khotimah. Aya deui jalma nu hade mimitina tapi jadi su’ul khotimah (na’udzubillah).

Ieu bukti yen hirup teh teu cukup ku modal nu dipimilik ku diri. Pikeun tetep aman kaimanan nepi ka maot, islam nepi ka maot, amal soleh nepi ka maot eta mutlak tina pitulung Alloh.

Sing inget, teu sadayana bisa meunang pitulung Alloh.

....وَمَا لِلظَّٰلِمِينَ مِنۡ أَنصَارٖ ١٩٢

Jalma nu boga kalakuan dholim (boh dirina memang dholim atawa cenderung ngahiji jeung jalma dholim) eta moal meunang pitulung Alloh.

وَلَا تَرۡكَنُوٓاْ إِلَى ٱلَّذِينَ ظَلَمُواْ

Kahade omat ulah sok babarengan jeung jalma-jalma nu darolim . Saha ari nu kaasup jalma nu dholim? Jalma kafir eta kaasup jalma dholim.

Naon atuh ari dholim teh?

اَلظُّلْمُ هُوَ وَضْعُ الشَّيئِ فِي غَيْرِ مَحَلِّهِ

Dholim nyaeta neundeun perkara lain dina tempatna/teu proporsional.

Nu jadi pertanyaan, saenyana palebah mana diri dholim ka diri sorangan? Nyaeta nalika urang apal/faham kana perkara anu salah, tapi urang masih ngalakukeun eta kasalahan. Nalika apal perkara teh bener tapi teu dilakonan, tah eta dholim.

Nabi Adam, terangeun/faham yen aya perkara di surga nu dilarang ku Alloh, nyaeta ngadeukeutan ngadahar buah khuldi. Tapi aya faktor sejen, desakan nu mempengaruhi jiwana nu akhirna ngalakukeun.

Biasana prilaku dholim eta rentan muncul nalika diri kajebak dina situasi jeung kondisi beurat nu notog ninggang ka diri, nu teu sesuai jeung kahayang hate.

Numawi, Syekh Ibnu Ath-Thoillah sasauran :

اِدْفِنْ وُجُوْدَكَ فِي أَرْضِ الْخُمُوْلِ, فَمَا نَبَتَ مِمَّا لَمْ يُدْفَنْ لَا يَتِمُّ نَتَاجُهُ. (الحكم  ص 11, الجز الأول)

Kubur (ambisi) diri anjeun dina taneuh anu samar (hate sanubari pangjerona), sabab ari pepelakan anu teu dikubur kalawan sampurna, maka moal sampurna dina jadina. - (Al-Hikam, hal 11, Juz ka hiji)

Dina nyanghareupan situasi kitu, Syekh Ibnu Athoillah ngabagi pangalaman anjeunna dina hal ngaredam diri, ngaredam emosi, kasombongan, kaayaan hate ku jalan disimpen dina sanubari nu paling jero.

Naon margina urang dianjurkeun diajar sapertos kitu? sabab aya hiji hal dina hate urang nu kacida bahayana, nyaeta syahwat (obsesi, ambisi) nu leuleuwiheun.

Nalika urang meunang anugrah ulah kalah hayang jadi tenar, atawa nalika urang meunang musibah ulah kalah diomong-omongkeun ka batur. Tapi kudu disanghareupan kalawan tenang, kalawan tanggung jawab diri dina nyanghareupan masalah. Ulah nepi ka masalah anu datang jadi nimbulkeun panik ka diri, sahingga muncul hiji kasempatan pikeun ngalakukeun kasalahan/dosa. Tina kasalahan eta nu matak nutup pitulung ti Alloh SWT., Naudzubillahimin dzalik.

Tapi nalika urang bisa konsisten ngalaksanakeun parentah Alloh dina kondisi kumaha wae, istiqomah dina ngajauhan larangan Alloh dina kondisi kumaha wae, maka Alloh bakal maparin pitulung ka urang, bakal maparin akhir bahagia pikeun kahirupan.

Teu sakedik conto jalmi-jalmi nu tertindas di awal, dipaparin cobaan malahan musibah, tuluy sabar jeung istiqomah ngalakukeun parentah Alloh ninggalkeun larangan-Na, dina sekian tempo waktu bisa jadi manusa nu sukses mungguh Alloh SWT.

Ku bentuk kasabaran nu eta upayakeun sing bisa ngaredam emosi diri, insya Alloh urang moal terlalu kaget/panik (nalika aya situasi nu teu pikaharep). Nalika urang teu kaget, maka mudah-mudahan teu aya sikap nu matak ngahalangan kana datangna pitulung Alloh SWT.

Mudah-mudahan urang salamina dipaparinan kakiatan ngendalikeun emosi diri, sahingga tiasa janten jalmi nu kenging pitulung ti Alloh SWT. Amin Ya Robbal Alamin.

© Pesantren Miftahul Huda 2015. All Rights Reserved.
Manonjaya - Kab. Tasikmalaya